Nyaruguru: Polisi y’u Rwanda yashimye uruhare rw’abagize CPCs

Kuva taliki  ya 11 Werurwe  kugeza ku ya 12 abapolisi bo mu  ishami rya Polisi rishinzwe  guhuza ibikorwa bya Polisi n’abaturage (Community Policing)  bari mu Karere ka Nyaruguru aho bahuguraga abagize  Komite  z’abaturage mu kwicungira umutekano (CPCs).

Bahugurwaga ku ruhare rwabo mu  kurwanya  COVID-19, inda ziterwa abangavu, kurwanya ibiyobyabwenge no kurwanya ingengabitekerezo ya Genocide, hahuguwe abantu 20 nabo bakazahugura abandi. Abahuguwe baturutse mu mirenge ya Kibeho, Cyahinda, Munini, Muganza, Busanze na Ruheru yose yo mu Karere ka Nyaruguru.

Aya mahugurwa yitabiriwe n’Umuyobozi  w’Akarere ka Nyaruguru, Habitegeko Francois, Umuyobozi wungirije mu ishami rya Polisi rishinzwe guhuza ibikorwa bya Polisi n’abaturage, Assistant Commissioner of Police (ACP)Rose Muhisoni, Umuyobozi wa Polisi mu Karere ka Nyaruguru, Superintendent of Police (SP) Alphonse Mayinga n’abandi bayobozi batandukanye.

Ubwo yafunguraga aya mahugurwa ku mugaragaro Umuyobozi w’Akarere ka Nyaruguru, Habitegeko Francois yashimiye Polisi y’u Rwanda yateguye ayo mahugurwa yo kongerera ubumenyi abagize Inzego z’abaturage mu   kwicungira umutekano (CPCs) hagamijwe gukumira ibyaha bitaraba. Yavuze ko ayo mahugurwa aziye igihe kandi azagira akamaro kuko abahugurwa baba  mu baturage umunsi ku wundi.

Yagize ati: “Abagize CPCs nk’abantu begereye kandi bahorana n’abaturage ntagushidikanya aya mahugurwa azakomeza gushimangira  uruhare rw’umuturage  mu kwicungira umutekano. Turabasaba gukorera hamwe no gukorana n’inzego z’ibanze n’iz’umutekano kandi mugatangira amakuru ku gihe ari na ko mubikangurira abaturage mu bana  buri munsi, bizatuma ibyaha bikumirwa bitaraba.”

Meya  Habitegeko  yakomeje yibutsa  abahugurwa   gukomeza gufatanya n’abaturage mu kurwanya COVID-19, kwirinda ibiyobyabwenge  ndetse n’ibindi byaha biteza umutekano muke.

Assistant Commissioner of Police (ACP) Rose Muhisoni yibukije ba CPCs  ko muri iki gihe Isi n’u Rwanda bihanganye n’icyorezo cya COVID-19,  abasaba  kugira uruhare mu gukumira ikwirakwira ry’iki  cyorezo ariko batanibagiwe  gukumira ibindi byaha.

Yagize ati “Muri abafatanyabikorwa ba Polisi y’u Rwanda ba hafi mu gukumira ibyaha. Murasabwa kuba aba mbere mu gushyira mu bikorwa ingamba zishyirwaho na Leta mu gukumira no kwirinda ikwirakwira rya COVID-19.

Turabakangurira kandi guhora mu rwanya inda ziterwa abangavu kuko akenshi  bigira ingaruka zitandukanye haba k’uwo byabayeho no ku muryango nyarwanda muri rusange.”

ACP Muhisoni yabasabye kurwanya ibiyobyabwenge kuko usanga ari byo ntandaro y’ibindi byaha bihungabanya umutekano. Yanabasabye kwirinda imvugo mbi zisesereza zigamije guhembera ingengabitekerezo ya Jenocide.

Umwe mubitabiriye aya amahugurwa, Ntitangiratiza Zabron waturutse mu Murenge wa Busanze, Akagari ka Nteko, Umudugudu wa Kabavomo yashimye Polisi y’u Rwanda kuba yabahaye amahugurwa abongerera ubumenyi mu kurwanya ikwirakwira rya COVID-19 ndetse no gukumira ibyaha. Avuga ko na bo bazagenda bagasangiza abandi ubwo bumenyi bahawe, kandi biyemeza kuzakomeza ubufatanye na Polisi mu kurwanya ibyaha bitaraba.

Aya mahugurwa yatanzwe hubahirizwa  amabwiriza yo kwirinda COVID-19 arimo kwambara agapfukamunwa,  gukoraba mu ntoki n’anazi meza n’isabune mbere yo kwinjira mu cyumba  cy’amahugurwa , kwicara  bahanye n’intera ya metero hagati y’umuntu n’undi  ndetse n’andi mabwiriza.

SRC: IMVAHO NSHYA

Johnson Ndekezi

http://www.virungareports.com

Ndekezi Johnson is Journalist by Passion and Co-Founder of VirungaReports.com

See author's posts